- I prosjektet har BKK samarbeida tett med både lokale grunneigarar og ekspertar på fisk for å få til ei god løysing, slik at vatnet igjen blir rikt på fisk og ein idyll for friluftsfolk, seier prosjektansvarleg Espen Hammersland i BKK.

Kløvtveit kraftverk i Gulen har vore i drift sidan mars 2006. I samband med utbygginga vart inntaksmagasinet Kløvtveitvatnet tappa ned. Dette vart gjort for å få tilsig frå Transdalsvatnet og Austgulstølsvatnet som ligg lågare enn Kløvtveitvatnet. Kløvtveitvatnet er etter utbygginga delt ved Mjåneset i eit hovudmagasin og Vetle Kløvtveitvatnet innanfor.

Overføringa frå Austgulstølsvatnet blir no lagt i røyr direkte til Kløvtveitvatnet, og overføringa mellom Vetle Kløvtveitvatnet og Kløvtveitvatnet skal proppast igjen. Det blir også laga ein liten dam, som blir 3,6 meter høg og 75 meter brei.

- Arbeidet skal gjerast ferdig i år. Så vil tilsig utover 2011 fylla opp Vetle Kløvtveitvatnet til naturleg vasstand, seier Hammersland.